RAS Katavi aongoza upandaji miti katika Halmashauri ya Wilaya Ya Mpimbwe ikiwa ni uzinduzi wa Kampeni ya Upandaji Miti kimkoa.

Posted on: January 24th, 2023

Katibu Tawala mkoa wa Katavi Hasan Mhe. Rugwa akiwa katika Halmashauri ya  Mpimbwe amewataka wananchi kuendelea kutunza miti ili kuweza kuendelea kuhifadhi mazingira ambayo yatasaidia katika kuleta  kukabiliana na mabadiliko ya tabia nchi.

"Zoezi hili la upandaji miti lina hatua nne ambazo zote kwa pamoja zikizingatiwa zitasaidia kukabiliana na hali ya mabadiliko ya tabia nchi,  tuzingatie upandaji miti, ulinzi wa vyanzo vya maji, utunzaji wa miche ambayo inapandwa na usafi wa mazingira" Amesema Mhe. Rungwe

Katika hatua nyingine katibu Tawala wa mkoa wa Katavi Mhe. Rungwe amewataka wananchi wote kushiriki kikamilifu  kwa kila familia kuhakikisha wanapanda Miti katika maeneo yao ya makazi.

Kwa upande wake Mwenyekiti wa Halmashauri ya Wilaya ya Mpimbwe Silas Ilumba amesema kutokana na kuwepo kwa wananchi wanao tumia sehemu za vyanzo  vya Maji kufanya shughuli za kibinadamu, hali hiyo inasababisha vyanzo hivyo vya asili kukauka maji mapema, hivyo ametumia nafasi  kumuomba mgeni rasmi, kutokana na ushirikiano uliopo kati ya mkoa wa Rukwa na Katavi kuweza kuliangalia swala hili ili kuepukana na uharibifu huo wa mazingira. 

Naye Rajabu Ramadhan mratibu wa upandaji miti Mkoa wa Katavi amewataka kuendelea kusimamia upandaji na uendelezaji wa utunzaji wa miche hiyo iliyo pandwa ili kuweza kufikia malengo yaliyo kusudiwa.

Aidha Afisa Mazingira wa Halmashauri ya Wilaya ya Mpimbwe Saka Muok amesema Halmashauri ya Mpimbwe inatarajia kupanda Miche 288,000 ambayo itapandwa  katika shule za msingi, shule za sekondari, vituo vya Afya, zahanati, vijiji, na katika makazi ya watu binafsi.

Mwisho

*Imetolewa na:*

*Kitengo cha Mawasiliano Serikalini*

*Halmashauri ya Wilaya ya Mpimbwe*